Lausnamót

Lausnamót eða hakkaþon er nýsköpunarkeppni þar sem áhugasamir aðilar koma saman, deila reynslu og þekkingu og skapa lausnir við vandamálum eða áskorunum. Enska orðið hackathon er sambræðingur orðanna hack og marathon en þar er hugmyndin að brjóta niður vandamál í smærri einingar og skapa lausn eða eitthvað nýtt. Tímaramminn er knappur en alla jafna telur hann frá 24-48 klukkustundum. Lausnamót eiga langa sögu en uppruna þeirra má rekja í tæknigeirann. Í dag eru lausnamót notuð við ýmsar aðstæður enda eru þau frábær leið til kalla fram margar lausnir við tilteknu vandamáli eða að koma góðum hugmyndum í framkvæmd. Að mótstíma liðnum fer skipuð dómnefnd yfir þær lausnir sem fram hafa komið og velja þá lausn sem fellur best að settu markmiði mótsins.

Lausnamót með sérstaka skírskotun til landsbyggðanna:

Hacking Hekla er lausnamót sem ferðast í kringum landið. Verkefnið hóf göngu sína árið 2020. Markmið Hacking Hekla er að varpa ljósi og efla frumkvöðlastarf á landsbyggðinni ásamt því að tengja saman frumkvöðla í dreifbýli og þéttbýli á Íslandi.

• Hacking Suðurland
• Hacking Norðurland
• Hacking Austurland
• Hacking Reykjanes

Önnur lausnamót

Nýsköpunarmót er vettvangur fyrir opinbera aðila og fyrirtæki að tengjast. Opinberir aðilar (stofnanir og sveitarfélög) setja fram áskoranir eða þarfir og óska eftir fjölbreyttum lausnum frá sprotum og fyrirtækjum.

Plastaþon var haldið af Umhverfisstofnun og Saman gegn sóun þar sem þátttakendur unnu að lausnum tengdrum því að draga úr plastnotkun, auka endurvinnslu og koma í veg fyrir plastmengun. Verkefnið er hluti af stefnu NordMarPlastic sem er formennskuverkefni Íslands í Norrænu ráðherranefndinni.

Spjaraþon var haldið af Umhverfisstofnun og Saman gegn sóun þar sem þátttakendur lærðu um vanda textíliðnaðarins og þróuðu í framhaldinu lausnir sem sporna gegn textílsóun.

Ullarþon var haldið á vegum Textílmiðstöðvar Íslands og Nýsköpunarmiðstöðvar Íslands. Markmið Ullarþonsins var að auka verðmæti ullarinnar, þá sérstaklega verðminnstu ullarflokkanna.