Norðanátt
Norðanátt er samstarfsverkefni stuðningsaðila í nýsköpunarumhverfinu á Norðurlandi og er ætlað að skapa umhverfi fyrir frumkvöðla og fyrirtæki á Norðurlandi með áherslu á nýsköpun á sviði sjálfbærni, orku, vatns og matar.
Norðanátt byggir á hringrás árlegra viðburða sem styðja við frumkvöðla með hugmyndir á ólíkum stigum en jafnframt er tilgangur hringrásarinnar sá að stoðumhverfið hafi allt árið um kring tiltæk verkfæri fyrir frumkvöðlaverkefni á ólíkum þroskastigum.
Fyrsti viðburður hringrásarinnar fór fram haustið 2021 en það er viðskiptahraðallinn Vaxtarrými þar sem áherslan var á að efla fyrirtæki sem eru nú þegar komin af stað.
Í byrjun árs 2022 fer fram vinnusmiðja sem styður við bakið á frumkvöðlum á fyrstu stigum en í framhaldinu verður þriðji viðburðurinn haldinn en það er Stefnumót fjárfesta á Norðurlandi þar sem fjárfestar og frumkvöðlar koma saman og kynnast öflugri nýsköpun og fjárfestatækifærum á svæðinu.
Að verkefninu standa Samtök sveitarfélaga á Norðurlandi vestra (SSNV), Samtök sveitarfélaga og atvinnuþróunar á Norðurlandi eystra (SSNE) , Nýsköpun í Norðri NÍN, RATA og Eimur.
