Textílmiðstöð Íslands
 | |
| Vefsíða | |
|---|---|
| Tegund | Miðstöð |
| Netfang | textilmidstod@textilmidstod.is |
| Heimilisfang | Árbraut 31, 540 |
| Staður | Blönduós |
| Landshluti | Norðurland vestra |
Textílmiðstöð Íslands á Blönduósi er samþætting Textílseturs Íslands (stofnað 2005) og Þekkingarsetursins á Blönduósi (stofnað 2012). Þar er rekin fjölbreytt starfsemi en áhersla er lögð á nýsköpunar-, þróunar- og samstarfsverkefni sem stuðla að atvinnuuppbygginu í tengslum við textíl, menningu og sögu svæðisins með áherslu á umhverfisvernd og sjálfbærni.
Textílmiðstöð Íslands byggir á samstarfi við ýmis fyrirtæki og stofnanir á Norðurlandi vestra og víðar, bæði í rannsóknar- og þróunarverkefnum á sérsviðum stofnunarinnar og eflingu menntunar en Textílmiðstöðin er hluti af Samtökum þekkingarsetra (SÞS). Textílmiðstöð Íslands er jafnframt þátttakandi í erlendum samstarfsverkefnum í gegnum NORA og Horizon2020 CENTRINNO. Miðstöðin stóð fyrir Ullarþon árið 2021 en það er lausnamót um íslensku ullina.
Innan Textílmiðstöðvarinnar má finna:
- Ós Textíllistamiðstöð: Alþjóðleg vinnusmiðja ætluð listafólki, fræðafólki og hönnuðum í textíl þar sem hægt er að sækja um mánaðardvöl í samvinnurými Textílmiðstöðvarinnar.
- Textíllab: Fyrsta stafræna textílsmiðjan á Íslandi opnaði í maí 2021. Textílsmiðjan er útbúin stafrænum tækjum sem tengjast textílvinnslu, eins og vefnaði, prjóni, þæfingu og útsaumi. Þegar hefur verið fjárfest í stafrænum vefstól, prjónavél og útsaumsvél, nálaþæfingarvél, auk leiserskera og vínylprentara.
- Textílklasa: Textílmiðstöð Íslands vinnur að mótun Textílklasa í samstarfi við Samtök sveitarfélaga á Norðurlandi vestra (SSNV).
