Rannsóknasetur Háskóla Íslands á Húsavík
Rannsóknasetur Háskóla Íslands á Húsavík er eitt af fjölmörgum rannsóknarsetrum Háskóla Íslands víða um land.
Rannsóknasetur Háskóla Íslands á Húsavík var stofnað haustið 2007 og hófst þá rannsóknastarfsemi þess. Setrið var formlega opnað 4. desember 2008.
Á vegum Rannsóknaseturins er mikil samvinna við háskóla og stofnanir hérlendis og erlendis, bæði um rannsóknir og kennslu. Mörg verkefnanna beinast að hvölum, en einnig svifi, sjófuglum og loftslagsrannsóknum og öðru sem tengist rannsóknum á hafinu og lífríki þess.
Rannsóknasetrinu er stýrt af Dr. Marianne Helene Rasmussen, sérfræðingi í rannsóknum á sjávarspendýrum. Marianne er með doktorsgráðu frá Háskólanum í Suður-Danmörku, Óðinsvéum, og bar doktorsritgerð hennar titilinn "A study of communication and echolocation sounds recorded from free-ranging white-beaked dolphins (Lagenorhynchus albirostris) in Icelandic waters”.
